Stilprent-aktrises

The Artist, 'n stilprent oor die lewe en loopbaan van die akteur George Valentin, is op die oomblik 'n groot treffer in fliekteaters.

Die aktrises wat gedurende die stilprent-era beroemd geraak het, was net so interessant. Hulle was ook die eerste sekssimbole.

Theda Bara - "The Vamp"

Die vampier- en femme fatale-rolle wat sy gespeel het, het haar die bynaam "The Vamp" gegee. Haar beste rolle was as Juliet en Cleopatra, in kostuums wat selfs vir vandag gewaagd is. Theda Bara was basies die moeder van "Goth" en "Emo".

Lyda Borelli - "Borellisimo"

Sy was beroemd vir haar pre-Rafaelitiese voorkoms en kon blykbaar haar lyf tot bo-aardse proporsies verdraai. Vroue het soos sy probeer lyk. Haar mees bekende femme fatale-rol was in Rapsodia Satanica, as 'n ou vrou wat 'n ooreenkoms met die duiwel maak om haar ewige skoonheid te skenk. Geen wonder dat vroue met haar kon identifiseer nie ... 

 Pauline Frederick

My gunsteling. Sy was vyf keer getroud, het 'n verhouding met Clark Gable gehad toe sy oud genoeg was om sy ma te wees. Sy was ook Joan Crawford se rolmodel en inspirasie.

Mae Murray

Haar byname was "The Girl with the Bee-Stung Lips" en "The Gardenia of the Screen". Haar klerestyl het nooit verander nie. Toe sy oud geword het, het sy nog steeds dik lae grimering (veral lipstif), kort rokkies en laehals-toppies gedra.

Louise Brooks

Sy was waarskynlik die mees beroemde stilprent-aktrise en sal altyd onthou word vir haar haarstyl en haar rol in Pandora's Box. Op 14-jarige ouderdom was sy reeds 'n alkoholis. Sy was ook verslaaf aan inkopies doen en moes haarself meer as eenkeer bankrot laat verklaar. Sy het nooit kinders gehad nie en het na haarself as "Barren Brooks" verwys. 



Nita Naldi

Theda Bara se navolger. Sy het bekend geraak vir haar rol in Dr. Jekyll and Mr. Hyde met John Barrymore. Die twee akteurs het nie van mekaar gehou nie en Barrymore het haar "Dumb Duse" genoem.



Lilian Gish

Word beskou as die beste stilprent-aktrise en een van die beste aktrises ooit. Haar fisieke broosheid het groot intensiteit en stamina as aktrise verberg, en sy word steeds as die beste Ophelia in Shakespeare se Hamlet beskou. 

Vera Kholodnaya

Vera Kholodnaya was die eerste beroemde Russiese stilprent-aktrise. Die rol waarvoor sy bekend geraak het, was dié van Anna Karenina. Tydens haar dood was daar stories in omloop dat die Franse ambassadeur met wie sy op daardie tydstip 'n verhouding gehad het, haar vergiftig het omdat hy oortuig geraak het daarvan dat sy 'n spioen vir die Bolsjewieke was. 



Ruan Lingyu

Ruan Lingyu was 'n Chinese stilprent-aktrise, die Greta Garbo van haar land. Sy het op 16 beroemd geraak. Op 24 het sy haarself vergiftig en 'n nota agtergelaat wat gelui het: "Skinderstories is 'n euwel". Tydens haar begrafnis het nog drie vroue selfmoord gepleeg.

Betty Compson

Sy is jonk uit die skool om geld te verdien vir haar familie. Sy het eers die viool gespeel, maar later het sy rolle in stilprente begin kry. Toe sy verveeld geraak het met dié loopbaan, het sy 'n modewinkel in Hollywood Boulevard oopgemaak.

Pina Menichelli

Die mees beroemde Italiaanse stilprent-aktrise en waarskynlik die eerste ster wat die bynaam "diva" gedra het.   

Brigitte Helm

'n Duitse aktrise, bekend vir haar rol in Fritz Lang se Metropolis. Sy het later moeilikheid in Nazi Duitsland opgetel omdat sy met 'n Jood getrou het. Nietemin het Adolf Hitler self daarop aangedring dat 'n aanklag van manslag teen haar laat val moes word nadat sy iemand doodgery het.